Måten vi lever på krev mykje areal. Det same gjer klimatilpassing og den grøne omstillinga samfunnet er i gang med. I tillegg treng naturen meir enn nokon gong å få tilbake areal av omsyn til naturmangfaldet. Og når naturkreftene herjar, tek dei tilbake areal. Areal er ein avgrensa ressurs – noko vi i Noreg ikkje har tatt inn over oss.

No ser vi tydelege målkonfliktar i kommunane sine arealplanar: ønsket om by- og næringsutvikling, klimatilpassing og ei nasjonal forplikting om å følgje opp den globale naturavtalen. Alt dette må kvar enkelt kommune balansere mellom. 

Årets konferanse har søkelys på korleis vi kan forvalte areala våre klokt og i samsvar med klimaendringane, bevaring av natur, utbygging av fornybar energi, utvinning av naturressursar og utvikling av byar, tettstader, hyttefelt og næringar.